२१ जेठ, काठमाडौं । सोमबार भएको शीर्ष नेताहरुको भेटवार्ताबाट संघको मन्त्रिपरिषद् पुनर्गठन र प्रदेश सरकारहरुलाई पूर्णता दिने सहमति जुटेको हो ।
सत्ता साझेदार शीर्ष नेताहरुबीच संघीय मन्त्रिपरिषद् पुनर्गठन गर्ने र प्रदेश सरकारलाई पूर्णता दिने सहमति जुटेको छ ।
सहमति जुटाउन सोमबार प्रधानमन्त्री पुष्पकमल दाहाल प्रचण्डले नेकपा एमालेका अध्यक्ष केपी शर्मा ओली र एकीकृत समाजवादीका अध्यक्ष माधवकुमार नेपालबीच वान अन वान र सामूहिक भेट गरेका थिए ।
अन्ततः तीनै जना सँगै बसेर अहिलेकै सत्ता समीकरणलाई बलियो बनाएर जान संघ र प्रदेशहरुको सरकारबारे सहमति जुटेको स्रोतले जनायो । प्रधानमन्त्री प्रचण्डले ७ जेठमा चौथोपटक विश्वासको मत लिएपछि आफू नेतृत्वको मन्त्रिपरिषद् पुनर्गठन गर्ने र प्रदेश सरकारहरुलाई पूर्णता दिने गृहकार्य थालेका थिए ।
उपेन्द्र यादवले सरकार छोडेपछि रिक्त स्वास्थ्य तथा जनसंख्या मन्त्री र स्वास्थ्य राज्यमन्त्रीमा अशोक राई नेतृत्वको पार्टीबाट मन्त्रीहरु बनिसकेपनि जनमत र नाउपा सरकारमा बाहिरै छन् । उनीहरुलाई समेत सरकारमा ल्याउन सत्ता साझेदार नेकपा एमाले र माओवादी केन्द्रबीच पहिला सहमति जुट्न जरुरी थियो ।
किनकि चौथोपटक विश्वासको मत लिँदा सत्ता समीकरणमै केही परिवर्तन आएको थियो । फेरिएको सत्ता समीकरण जोगाइरहन प्रधानमन्त्री प्रचण्डलाई जनमत, नागरिक उन्मुक्ति पार्टी नाउपा र जसपा नेपाल फुटाएर अशोक राईले बनाएको जसपालाई सरकारमा ल्याउनुपर्ने थियो ।
तर नेपाली कांग्रेससहित विपक्षी दलहरुबाट भइरहेको संसद्को गतिरोध हटाएर बजेट ल्याउनुपर्ने दबावमा प्रधानमन्त्री थिए । सहमति जुटाएर बजेट ल्याउन प्रचण्डले लगातार विपक्षी र सत्ता साझेदारहरुबीच छलफल गरेका थिए ।
माओवादी केन्द्रका एक पदाधिकारी, सोमबार शीर्ष नेताहरुबीच जुटेको सहमतिले सत्ता समीकरणमा देखिएको समस्या तत्काललाई हल भएको बताउँछन् । ‘बजेट पारित गर्ने निर्णय भइसकेको छ । संघ र प्रदेश सरकारले पनि पूर्णता पाउने सहमति जुट्यो’ ती पदाधिकारी भन्छन्, ‘अब सरकारबारे लिएर चिन्ता गर्नु पर्दैन ।’