कैलाली निर्वाचन क्षेत्र नं. २ बाट निर्वाचित प्रतिनिधिसभा सदस्य अरुण कुमार चौधरी १७ दिने जेल बसाइपछि आइतबार रिहा भए । नागरिक उन्मुक्ति पार्टीबाट चुनाव लडेका उनी राष्ट्रपति विद्यादेवी भण्डारीबाट सजाय माफी भएपछि रिहा भएका हुन् ।
उहाँ भन्नुहुन्छ
यो घटनाले निकट भविष्यमा चुनौती भन्दा पनि कम समयमै धेरै पाठ सिकियो । राजनीति यति सरल छैन । कदम–कदममा पाइला छामेर हिँड्नुपर्ने अवस्था छ । तथापि अहिले राष्ट्रपतिज्यूबाट भएको आम माफीलाई मैले मेरो कानुनी लडाइँको अन्तिम विन्दु मानेको छु । राष्ट्रकै सर्वोच्च निकायबाट निर्णय भइसकेपछि कानुनी लडाइँको च्याप्टर नै क्लोज भएको मैले ठानेको छु । किनकि, उच्च अदालत, महान्यायाधिवक्ता कार्यालयबाट राय मागेपछि राष्ट्रपतिज्यूबाट भएको निर्णय हो । यो भन्दा ठुलो कानुन नहोला ।
अवश्य, आजदेखि म पुनः माननीयको हैसियतमा छु । जनताको हक हितको लागि लामो समय आन्दोलनमा थिएँ । आम जनता, मतदाताले मलाई अमूल्य मत दिई जिताउनुभएको छ । उहाँहरूको हित, हक अधिकारको लागि उहाँहरूसँगै हुनेछु । उहाँहरूसँग गरेको बाचा पूरा गर्न लाग्नेछु । उहाँहरूको हितलाई सर्वोपरि ठानेर संसद्मा निर्धक्कका साथ आवाज उठाउने मेरो ध्येय हो ।